Izan ere, denborak erakutsi du bai enpresa munduan, eta baita administrazioan, batez ere, pertsonak kontuan hartzen ez dituen gobernantzak porroterako bidea hartuko duela, lehenago edo geroago.
Beldurra ematen dute praktika asanblearioek, horiek gobernaezinak eta kudeatzeko oso zailak izan daitezkeelako. Egia da. Hori bai, egiteko beste modu batzuk ere badaude, pertsonen iritziak kontuan hartuta, haien errealitateaz jabetuta eta haiek esandakoak zuzen eta egoki jasota.
Are gehiago, jasotako informazio hori guztia erabil daiteke errealitatea eraldatzeko eta hura hobea izan dadin ahalegintzeko: momentuaren beharrei egokituagoa.
Egiteko modu horiek hazten ari dira berrikuntza sozialaren bitartez: entzuteko erremintak eta plataformak eskainita; izan ere, horiek erabilita, agertoki berriak azaltzen dira, etorkizunean leku jasangarri eta adeitsuagoa lortzeko bidean.
Bada, plataforma horiek martxan daude Arrasaten. Eta kooperatibismoan aitzindari izan ginen neurrian, aberastasuniturri solidarioagoa eta hobeto banatua sortuta, bidea zabaltzen ari gara entzutearen bitartez gure balio eta sinesmenak ezagutzeko, gure K; hain zuzen ere, jakiteko zer gura dugun gure enpresekin, gure enpleguarekin, gure kulturarekin.
Eskualdea bere etorkizuna marrazten ari da. Mundu osoko lehen mailako eragile eta erakunde asko Arrasateri begira daude; izan ere, pertsona ausart batzuen bitartez, orain arte ukaezinak ziren eskemak hausten ari dira. Entzutea da berrikuntza, eta herri honek, beste behin ere, argi izan du hori, eta arriskatu egiten du.
