Edo okindegiko ilaran, zain, labea zabaltzean irteten den epeltasunaz eta usainaz gozatzen, ogi epela esku artean hartzen… Edo zure etxeko gozotasunean, zure tristurak sabelean sortzen duen korapiloa sentitzen, bilatutako bakardadeaz gozatzen, babesgune den zure txokoaren intimitatean…
Askotarikoak dira egunero bizi ditugun emozioak; gozoagoak batzuk, latzagoak besteak… baina benetan behar bezala dastatzen ditugu? Ezetz esango nuke; horregatik, sentsazioen kaptura egiten saiatzen naiz ni. Momentu horietan, zentzumen guztiak aktibatu, memorian gordetzeko arreta eskaini eta 1, 2, 3, klik!, kaptura egiten dut. Honek momentua intentsitate handiagoz bizitzen laguntzen dit, eta gero, behar dudanean, berriro ekartzen ditut gogora dastatzeko, birgogoratzeko… Zailagoa da, noski, desatseginagoak diren emozioekin, beldurra, tristura… baina hauei ere bere tokia eta garrantzia ematen laguntzen du. Pistak ematen ditu. Interesgarria da. Interesgarriak gara.