Pilota goxoarekin esku pilota txapelketa jokatuko da egunari hasiera emateako, eta, 09:30ean hasita, bederatzi bikote arituko dira jokoan. Horren ostean, 11:00etan, herri kirolak egingo dituzte, eta Labidean eman dute zenbaitek izena parte hartzeko. Bazkaraia, berriz, 14:30ean egingo dute eta antolatzaileek azaldu dutenez, "50 lagun inguru batuko gara bazkaltzeko".
Bazkalostean, esku pilota txapelketako finalak jokatuko dituzte, eta sariak banatu ostean, kontzertuak izango dira.
Kontzertuak, 19:30ean
Etxekalte talde bermeotarra izango da, batetik, Leintz Gatzagako San Migel enparantzako oholtza gainean. Grunge, Hardcore, Post-Hardcore, Post-Rock, Rock Melodikoak, Rock Alternatiboa,… eraginda, ahots melodikoek, gitarra zikinek eta erritmo gogorrek definitzen dute beraien izaera.
Horrekin batera, The Clayton Aramaioko taldearen kontzertua izango da. Rock, blues eta punk ukituak eskaintzen arituko dira 2023 urtean Danbaka musika lehiaketa irabazi zuten musikariak.
