goiena.eus

Berrikuntzekin datoz Leintz Gatzagako udaleku irekiak

  Gizartea  Leintz Gatzaga

Guraso Elkarteak antolatutako udaleku irekiak astelehenean hasi zituzten, eta, uztailaren 21era arte, hiru asteko iraupena izango dute. 11:00etatik 13:00etara eta 16:00etatik 18:00etara izango dira.

Berrikuntzekin datoz Leintz Gatzagako udaleku irekiak
Udalekuetan herri kirolak egiten. | Ikusi handiago | Argazki originala

Aurtengo begiraleek urarekin egiteko jokoak, argazki lehiaketa, herri kirolak… antolatu dituzte, baina aurten berritasunak ere izango dituzte. Honela azaldu du Aitziber Gorosabelek, Guraso Elkarteko kideak: "Astean behin irteera egingo dute, eguen edo egubakoitzean izango dena, eguraldiaren arabera. Hala, hirugarren astean, esaterako, kanpaldia egingo dute Dorletan. Egun batez, Iurre Romaretazabala eskoriatzarra etorriko da udalekuetako haurrei hitzaldi bat eskaintzera, baina eguna zehaztu barik dago oraindik… besteak beste".

Gatzagatik Lizarrara bizikletan

Udalekuak amaitzeko, uztailaren 25ean, Gamarrara irteera egingo dute gurasoek 10 urtetik gora duten haurrekin batera, eta handik Lizarrainoko bidea hartuko dute. "Gamarran egun-pasa egingo dugu, eta haurrek gurasoekin Estibalizerainoko bidea egingo dute; handik begiraleekin joango dira Lizarraraino. Hain zuzen, hauxe izango da bidea: Gatzaga–Gamarra–Estibaliz–, gurasoekin, eta Maeztu–Acedo–Lizarra, begiraleekin".

Izen-ematea asteka

3 eta 13 urte arteko haurrentzat zuzendutako udalekuetan astero eman daiteke izena. Aste honetan, esaterako, 10-11 haur artean aritu dira udalekuetan, baina aukera dago datozen asteetarako zein uztailaren 25eko bizikleta irteera joateko izena emateko.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa