Lasterketak 40 urte beteko ditu etzi, eta antolatzaileek urteroko osagaiei eutsi gura izan die: ziklistek hirutan igo beharko dituzte Gatzagako maldak. Amateur mailako talde onentsuenak izango dira irteera puntuan (10:00), eta ziklistek 123 kilometro izango dituzte aurretik. Hala, Gatzagan hasi eta Arrasateraino jaitsi eta gero –Epeleko biribilean emango dute buelta erdi– lehenengoz igoko dute Gatzaga, eta ia Urbinaraino –Araba– joango dira (42. kilometroa). Ostera ere Arrasateraino jaitsiko dira (68), eta Aretxabaletan esprint berezia izango dute Gatzaga ostera ere igotzen hasi aurretik. Oraingoan ziklistek Arlabanen emango dute buelta erdi, eta Arrasatetik gora goizeko hirugarren igoera erabakigarria izango dute (13:05).
