Puntu gehien Libe Goenagak batu zituen, 330, eta pozik agertu zen egindako lanarekin. Libek ia ariketa guztietan lortu zituen puntu gehien, 8ko txikian izan ezik. Bere ariketa esanguratsuena, bestalde, ganbarakoa izan zan.
Jon Mata "gustura" egindakoarekin
Oholtzan izan ziren gainontzeko bertsolarien artean, Jon Mata antzuolarra eta debagoiendar bakarra ere izan zen. Bi urte eta erdi, soilik, bertsotan aritu dela adierazi zuen saioan; Oñatin hasi zela Urko Arregirekin, eta, orain dela urtebete Antzuolan bertso eskola sortu zutela. Txapelketara animatzea erabakita, irabazteko asmo gabe, esperientzia bizitzera joan dela nabarmendu zuen saioaren amaieran. Gaineratuz, saioaz gozatze hutsa izan dela bere txapela. "Teknikoki nahi baino okerrago, baina, esperientzia oso ona. Lehenengo aldiz txapelketa baten aritzea bizi izan dut behintzat", adierazi zuen saio amaieran bertsolari antzuolarrak.
Zazpigarren postuan geratu zen antzuolarra, 269 puntu jasota, baina, aretoa jendez beteta izan zen, eta horietako asko Mataren etxekoak eta lagunak. Pankarta ere jarri zuten zintzilik Zaldibar antzokian, eta, egunerako prestatutako kamiseta pertsonalizatuekin ere izan ziren hainbat lagun.
- Libe Goenaga Arrieta. 330
- Peru Aiartza Carajaville. 316,5
- Emaitz Murua Arzallus. 312,5
- Andoitz Urdapilleta Gurrutxaga. 302,5
- Antton Fernandez Lasa. 299,5
- Asier Ibarguren Amondarain. 297,5
- Jon Mata Etxaniz. 269
- Joar Garate Rueda. 258
Antolatzaileak "pozik"
"Oso sentsazio ona. Gogotsu geunden hasteko, ilusioz, eta gaurko saioa eta-gero, indartuta. Almeneko bertso eskolaren urteurrenari omenalditxoa egin nahi genion, eta horregatik hasi gara Eskoriatzan", azaldu zuen Beñat Azaldegik, Gipuzkoako Bertsozale Elkarteko sustapen eragileak.
Hankamotx bertso eskolako ordezkaritza
Eskoriatzako Hankamotx bertso eskolako haurren gurasoek, bestalde, mokadutxoa ere prestatu zuten ikus-entzule guztientzat, herrian egindako saioa eskertzeko modu gisa. Bertso-eskolako gaztetxoek, bestalde, ilusioz bizi zuten bertso ekitaldia.
