goiena.eus

Adostasun barik, datorren asterako itxita

  Gizartea  Eskoriatza

Martitzenean edo eguaztenean itxiko da Santa Ana auzoko aparkalekua, bertako lurren jabego pribatuaren eta Udalaren artean ez delako adostasunik izan. Bestalde, Huhezin 40 autorendako gunea egiteko proiektua gauzatu nahi du Udalak.

Adostasun barik, datorren asterako itxita
Eskoriatzako Santa Ana auzoko aparkalekua autoz beteta. | Ikusi handiago | Argazki originala

Santa Anako aparkalekuaren etorkizunaz asko hitz egin da herrian azken asteetan. Udalak eta bertako lurren jabeek ez dute akordiorik adostu, eta, beraz, itxi egingo da. Herrigunearen erdian dagoen aparkalekua erabilpen handikoa da, 80 aparkaleku dituena, eta Udalak alternatiba bilatu du.

Honela azaldu du Udal Gobernuko kide Josu Ezkurdiak, Hirigintza eta Mugikortasun batzordeburuak: "Lur eremu pribatuko jabeekin akordio batera ez garenez iritsi, datorren astean itxiko dugu. Bi-hiru eguneko epea utzi dugu, bertan dauden autoak ateratzeko, baina martitzenerako edo eguaztenerako itxita izango da".

Proiektu berrian aurrerapausoa

Alternatiba gisa, herrian zehar 40 aparkaleku egin dituzte, eta Huhezi unibertsitateko Dorleta eraikinaren ondoko belardian beste 40 egin nahi ditu Udalak. "Huhezikoen jarrera oso ona izan da, eta hainbat eskaera tekniko betetzen baditugu, doan utziko digute lur eremua", azaldu du Ezkurdiak.

Huheziko belardia unibertsitatearena da, eta adostasun batera iritsi da Udala bertan aparkalekua egiteko. Asmoa irailean hitzarmena sinatzea eta obrak urrirako amaituta izatea da, hainbat baldintza betez: oinezkoentzako pasoa uztea, argiztapena jartzea… Lanen kostua, berriz, 20.000 eurokoa izango dela aurreikusten dute.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa