Aste hauetan ikus-entzunezko komunikazioko ikasleak film laburrak grabatzen dabiltza Debagoienean eta baita Euskal Herriko beste txoko batzuetan ere. Guztira sei film grabatuko dituzte eta asmoa da bukaeran film labur guztiak batu eta film luze bat egitea.
Aktore ezagunak
Eskoriatzako HUHEZI fakultateko laugarren mailako ikasleak dabiltza horretan hain zuzen, eta taldetxo bat, esaterako, gaur Eskoriatzako zaharren egoitzan izan da grabazioa egiten. Ikasleekin batera, aktore ezagunak izan dira eurekin: Jose Ramon Soroiz, Peter Ansorena eta Loli Astoreka.
Grabazioetan parte hartu dute baita ere, besteak beste, Asier Hormazak, Iker Galartzak edota Sara Cozarrek eta Goenkalen aktore lanetan ibilitako beste askok ere hartu dute parte proiektuan.
Ikasleak pozik
Ikasleak oso pozik daude proiektu honekin; oso gustura dabiltzala azaldu digute eta aktoreek euren gomendioak ere egiten dizkietela kontatu digute.
Film labur guztiak editatzen amaitutakoan, horiek guztiak elkartu eta film luze bat egingo dute ikasleek.
Astelehenean, 'Magazinea'-n
Proiektuari buruz zabalago egingo dugu berba asteleheneko Magazinea saioan iluntzeko 20:20an eta Goiena telebistan izango dugu Aitor Arregi ikus-entzunezko komunikazioko irakasle oñatiarra xehetasun guztiak ematen.
