San Pedro egunean, ekainaren 29an hortaz, inauguratuko da Eibar-Gasteiz autobidearen gaineko erakusketa, kultura etxean, 10:00etan. Udalak ez du zehaztu oraindik zenbat denbora izango den erakusketa zabalik, baina gutxienez, bi bat aste izango dela uste dute. Goiz eta arratsaldez izango da bisitatzeko parada.
Eskoriatzako kaltetuek, Udala barne, hainbat alegazio aurkeztu zizkioten Foru Aldundiaren egitasmoari, baina gehienak atzera bota zituen Aldundiak. Orain, erakusketa horrek aldez alde ipintzen ditu bataren eta bestearen proposamena. Batetik, alegazioen testuak izango dira irakurgai, eta baita hainbat plano ere. Baina erakusketaren alderik ikusgarriena, seguruenik, kaltetuek prestatutako argazki-muntaiak izango dira, Aldundiaren egitasmoaren eragina begi bistara ekarriko du-eta, eta baita, kontraste moduan, eskoriatzarren proposamenen eragina zein izango litzatekeen. Hogei bat muntaia ipiniko dituzte.