39.06 eginda, lehen emakumezkoa izan zen Joxe Muxika elgetarra Zumaiako Triatloi Herrikoian –350 metro igerian, 10 kilometro bizikletan eta 2,5 kilometro korrika–.
Bere lehen esperientzia izan da triatloian, eta pozik dago, batez ere, lasterketan izan zituen sentsazioengatik. "Beti izan dut gogoa probatzeko, eta, distantzia motza izanik, animatzea pentsatu nuen. Pozik nago ez irabazi nuelako, gorputzak ondo erantzun didalako baizik", azaldu du Muxikak. Josu Gisasola lagunak animatu zuen parte hartzera. "Berarengatik izan ez balitz, ez nuen parte hartuko", dio.
Atzetik aurrera
74 emakumek hartu zuten parte lasterketan eta lehenengo zatian –igerian– nahiko atzean zebilen Muxika. Hala ere, bizikletan asko aurreratzea lortu zuen –"hori izan zen gakoa"–, eta ondoren, korrikako tartean lasterketa errematatzea lortu zuen. "Igerian lasai egin nuen, trankil hartu nuen. 40. postuan irten nintzen igeri egitetik, baina bizikletan, nuen guztia eman nuen eta ia aurreraino joan nintzen, bigarren posturaino. Ondoren, korrika eman nuen mailarekin ni neu ere harrituta gelditu nintzen, eta irabaztea lortu nuen".
Esperientzia, "oso polita"
Muxikak adierazi du esperientzia "oso polita" izan zela. "Oso giro ona zegoen, parte-hartze handia, antolakuntza aldetik ere guztia oso ondo eta bide bazterrean jende ugari animoak ematen eta lasterketa ikusten". Hala ere, oraingoz, lasai hartu nahi du kontua eta ez daki aurrerantzean distantzia luzeagoko triatloietan parte hartuko ote duen.