Atzo, ekainak 13, bete ziren bi urte indarrean den udal agintaldia hasi zela, eta batzar irekia egin zuen Elgetako EH Bilduk. 22 lagun elkartu ziren udaletxeko osoko bilkuren aretoan ordu eta erdiz agintaldiko lehenengo bi urteotan egindakoak baloratzeko eta aurrera begirako lehentasunen inguruan azalpenak emateko. Horrekin batera, eztabaidatu eta ekarpenak jasotzeko.
Balorazio positiboa
"Lan itzela izan da arlo askotan orain arte egindakoa jaso genuen udaletxearen kudeaketa, nora eza eta egoera ekonomikoa zuzentzeko; kalte ordainak ordaintzen hasi, diru-laguntzak eta hobariak hobetu eta behar gehien dutenengana bideratu... Bestetik, batzordez batzorde emandako urratsak ere positiboki baloratu genituen. Hobetzeko eta aldatzeko asko dago, ordea, eta erronka horiei herritarrekin batera ilusioz aurre egingo die EH Bilduko lan-taldeak!", adierazi dute.
