Balerdi Balerdi bueltan
Duela hiru urte egin zuten Balerdi Balerdiren lehen berragerpena, Balerdi Erdi izenarekin. Toño Muro (ahotsa eta gitarra), Marino Goñi (baxua) eta Sergio Ibarrola Zaratrusta (bateria) izan ziren Balerdi Erdi haren protagonistak. Oraingoan, baina, Balerdi Balerdi izen osoarekin datoz, jatorrizko taldeko bi partaide bakarrik egon arren: Toño Muro eta Sergio Ibarrola Zaratustra. Karlos Ortiz gazteak hartu du baxua jotzeko ardura.
Balerdi Balerdi taldea pop indartsu edo power-pop estiloan kokatu izan da eta bi disko eta 10 haztebeteko binilo bat argitaratu zituzten sei urtean. Gaurko kontzertuan, disko haietako abestiez gain, Toño Muroren aurreko taldeetako abesti bana (Tocamas, Fuletamol, Motos eta Fiebre) eta Balerdi Balerdiren kanta berriak ere entzun ahal izango ditugu. Murok aitortu digunez, sei bat abesti berri egin dituzte eta diskoren bat grabatzea ere badute buruan. Kanta berrietan power-popa beste estilo batzuekin nahastu dute; ska doinuak ere entzungo dira.
Morau kantautorea
Andoni Tolosa Morau kantautore hernaniarrak folk-rock doinuak eskainiko ditu. 1996an argitaratu zuen Morauk lehen diskoa eta harrezkero ez da gelditu. Aspaldiko ezaguna dute Espaloian eta etxean moduan izango da, beraz.
Gaur, ekainak 1, 22:30ean hasiko da kontzertua Elgetako Espaloian. Sarrera 8 euro kostako da; 5 euro ordaindu beharko dute bazkideek.