Uriburu inguruan etxeak egiteko dagoen asmoa aspaldikoa bada ere, oraindik ez dira lanak hasi. Hala ere, proiektua aurrera doaeta aurki hasiko dira lanean.
Hirualdebat S.L. promotorea arduratuko da bertan etxeak egiteaz, eta enpresatik jakinarazi digutenez, azaroan etxeak egiteko lehenengo lanak hasiko dituzte, lurrak mugitzeko obrak, hain zuzen ere.
Hainbat motatako etxeak egingo dituzte Uriburun. Besteak beste, 10 txalet, bi bizitzako beste 20 etxe eta baita elkarri atxikitutako 18 etxe ere. Etxebizitza bloke bat ere eraikiko dute bertan. Azken hauek seguru aski mugatutako preziodun etxeak izango dira.
Oraindik etxeak salgai jarri ez badituzte ere, esan digutenez, asko dira Elgetatik etxe hauen gaineko informazio eske joan direnak eta batzuek erretserba ere egin dute jadanik.
Arau Subsidiarioak
Uribururako plan partziala, ordea, oraindik onartzeko zain daude Udalean. Izan ere, arau subsidiarioetan hainbat aldaketa egin zituzten, besteak beste Uriburu inguruari eragiten diotenak. Aldaketa hauen arabera, bertan eraiki beharreko hainbat etxebizitza babes ofizialekoak edo kontzertatuak izan daitezke. Hasieran babes ofizialekoak bakarrik izatea begiesten zen arauetan. Beraz, onarpenaren zain egon beharko dira.