EBAn jarraituko du Ointxe!ko lehen taldeak

Xabier Urtzelai 2017ko uzt. 18a, 19:30
EBAn jarraituko du Ointxe! saskibaloi taldeak.

Azken unera arte borrokan ibili eta gero MU saskibaloi taldeak ligako azken unean galdu zuen EBAn jarraitzeko eskubidea, maiatzean. Bada, kantxan lortu ez dutena bulegoetan lortu du klub zuri-moreak, federazioak Ointxe!-ren proposamena onartu du-eta kategoria horretan zuen hutsunea betetzeko. Gaur, martitzena, egin da albistea ofizial.

Azken urteak EBA mailan egin eta gero, aurten lehenengo taldeak arazo handiak izan ditu jokalari kopuruarekin. Lan arrazoiak eta lesioak tarteko Josu Larreategik ezin izan ditu hainbat jokalari eskura izan, eta Arrasatekoa moduko talde batean asko igartzen dira halako hutsuneak. Bada, jokalariek lan galanta egin badute ere –urte osoan izan dira lehiakorrak– liga amaieran ezin izan diote urte osoko erronkari eutsi. Federazioak, baina, gaur baieztatu diete EBAn segiko dutela: "Uztailaren 3an kategorian jokatzeko izenemate epea zabaldu zuen federazioak, eta ordurako hartuta geneukan erabakia. Klubak 50 urte beteko ditu datorren urtean, eta urteurrena EBAn egonda ospatu gura genuen. Hala, uztailaren 3rako dokumentazio osoa aurkeztu genuen federazioan. Izan ere, lehenengo, kategoria horretan jokatzeko eskubidea duten taldeen eskaerak jasotzen dituzte, eta horiek dute lehentasuna. Baina, hutsunerik balego, guk, badaezpada, izena eman genuen, eta martitzenean baieztatu ziguten federaziotik aukeratutako taldea ginela. 

Taldea indartzea, beharrezkoa

Albiste horren aurrean Ointxe!-k ezinbestean indartu beharko du lehenengo taldea, aurten izan dituzten larritasunak ez errepikatzeko. Eta, albistearen berri izanda horretan jardungo dute Ointxe!-ko zuzendaritzakoek, taldea eratzeko edo indartzerako orduan ez delako gauza bera EBAn egotea, ala Lehen Maila Nazionalean. "Baliteke lehenengo talderako jokalariren bat edo beste kanpotik ekarri behar izatea. Dena dela, EBAn jokatzea ondo dago, baina orain arte egin den moduan, harrobian jarri gura dugu indarra", adierazi du zuzendaritza berriko kide Fran Fernandezek.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak