goiena.eus

Fagor CNAko langile guztiak EREan

  Ekonomia  Arrasate  Debagoiena  Eskoriatza

Bulegoetako eta sare komertzialeko langileei ere lan harremanak eteteko enplegu erregulazioa (EREa) aplikatzeko aukera gura du CNA taldeko zuzendaritzak. Batzar ofiziala izan dute Langile Batzordeko ordezkariekin goizean, ERE hori noiz eta zela aplikatuko duten zehaztu barik. Gauzak horrela, Fagor CNA taldeko 350 langileek izango dute Enplegua Erregulatzeko Espedientea indarrean, horietatik 30, gainera, kalera bota gura dituzte.

Fagor CNAko langile guztiak EREan
Fagor CNAko langileak, batzordeko presidente Rikardo Perezi entzuten. | Ikusi handiago | Argazki originala

Hain justu, 30 kaleratze horien gaineko batzarra ziren egitekoak gaur CNA Taldeko zuzendaritzako ordezkariek Langile Batzordeko ordezkariekin, baina atzeratu, eta bihar egingo dute; "baina beste bilera bat izan dugu bulegoetarako suspentsioko EREa gaudelako negoziatzen", jakinarazi du Rikardo Perezek, Langile Batzordeko ordezkariak. "ERE hau onartzen denean talde osoa izango da EREan": 350 langile, beraz.

Kaleratzeak

10:00etan bukatu da bilera hori. Ordubete horretan, fabrikaren sarreran elkarretaratzea egin dute gainontzeko langileek. Eta bihar, esandako moduan, beste batzar bat izango dute; biharkoa 30 langileren kontratu etetearen gainekoa. Kasu horretan, negoziatzeko zirrikitu txikia utziko diete langileen ordezkariek zuzendaritzakoei: "Gure helburua da hori kentzea", dio Perezek. 15 egun dute negoziatzeko.  

Eguaztenerako egin dute, berriz, hurrengo hitzordua langileek, 18:30ean Arrasateko Herriko Plazan; kasu horretan, elkarretaratzea egiteko.

Ia dena geldi

Bien bitartean, Fagor CNA-ko "produkzioa dena dago geldi, Eskoriatzako lapikoena eta Geyserreko langile batzuena izan ezik"; azken horiek uztailaren 19ra arte -oraingo asteko eguaztena- daude lanean, besterik ezean. Baina, "ana egon badago", azpimarratu du langileen ordezkariak.

Gauzak horrela, guztiek segitzen dute bideragarritasun planaren zain. "Jaurlaritzarekin harremana izan dugu eta esan digutena da eurak ere zain daudela bideragarritasun plan hori zelakoa den ikusteko", jakinarazi du Perezek.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa