Errepideko proban, domekan, ziklistek 42 kilometrotako lasterketa izan zuten. Hainbat ihesaldi saiakera egon ziren, baina Amondarainek aurrera egin eta bederatzi lagun geratu ziren aurrean –tartean lau euskaldun–. Hala, euskal selekziokoen etengabeko eraso saiakeren ondoren esprintera iritsi ziren, eta hor Estebezek lagunduta –bosgarren izan zen– Lartitegi izan zen azkarrena. Bada, taldeka urrea irabazi zuten euskal ordezkariek.
Brontzea, berriz, erlojupekoan eskuratu zuten, zapatuan. Euskal ordezkariek 10.45eko denbora egin zuten, eta Gaztela Leonen (10.37) eta Madrilen (10.41) atzetik geratu ziren.
