Triatloiaren harrobitik ere landu beharra dagoela sinetsita antolatu du Antxintxikak hirugarren Triatloi Txikia: "Lasterketen aurretik briefing edo ikastarotxo bat eman diegu, azalpenak, kirol honetako araudia azaldu... Eta, ondoren hainbat kategoriatako lasterketak egin ditugu. Gaztetxoenen kirol jarduna zaindu egin dugu, erritmoa guk markatuta, lasai ibil zitezen, eta ondorengo kategoriatan libre lehiatu dira", adierazi du antolaketa taldeko Mikel Labakak.
Gipuzkoako federazioko presidente Iban Perezek ere positiboki baloratu du ekimena: "Laguntzera gerturatu naiz, eta lan polita egin dute aurten ere. Etorkizunean erreferenteak izango direnak ondo zaindu behar ditugu, kirol hau erakutsi egin behar diegu, joan daitezela triatloiaren dinamika hartzen, eta horretarako eguna izan da gaur. Gainera, geroago eta gazte gehiagok hartzen du parte halakoetan".
