goiena.eus

Interneten ere, lehen hitza euskaraz

  Euskara  Debagoiena

Interneten ere, lehen hitza euskaraz lankidetza-proiektua aurkeztu dute gaur PuntuEUS Fundazioak, CodeSyntaxek, Ikastolen Elkarteak eta Kontseiluak, Interneten lehen hitza euskaraz egitearen garrantziaz ohartarazi eta erabilera areagotzeko.

Interneten ere, lehen hitza euskaraz
'Interneten ere, lehen hitza euskaraz' lankidetza-proiektuaren aurkezpena. | Ikusi handiago | Argazki originala

Gaur egun, webgune batean sartzen garenean, erakusten zaigun edukia, gehienetan, gure nabigatzailearen hizkuntzaren araberakoa da. Ondorioz, nabigatzailea edo mugikorra euskaraz konfiguratuta badago, webgunea euskaraz agertuko da; bestela, berriz, erdaraz; normalean gaztelaniaz edo ingelesez. Panorama "kezkagarria" dela adierazi dute gaur aurkeztu den lankidetza-proiektuan. Lan-talde honek sarean egin dituen neurketek diotenez, Euskal Herriko internauten %3-5 inguruk bakarrik dauka euskara zehaztuta nabigazio-hizkuntza bezala. Kopuru hori bikoiztu egiten da euskaldunen artean (%10 inguru), baina hala ere, oso kopuru txikia da. Internauta teknofilo eta motibatuenen artean ere, gehiengoa dira nabigazio-hizkuntza erdara daukatenak (%70-80 bitartean).

Interneten ere, lehen hitza euskaraz lankidetza-proiektuko kideek nabarmendu nahi izan dute, euskaraz nabigatu ezean, webguneak garatzen dituztenek ez dutela euskara kontuan hartuko, eta beraz, ez dela euskarazko edukirik izango. Are gehiago, mugikorren eta ordenagailuen sistemak ere ez dituzte euskaraz kaleratuko. Horregatik, nabigatzaileak eta mugikorrak euskaraz jartzeko kanpaina abiatuko dute aipatutako erakundeek.

Erabiltzaileei eta webguneen arduradunei deia

Kanpaina erabiltzaileei eta webguneen arduradunei zuzenduko zaie. Alde batetik, sustatzaileek erabiltzaileak gonbidatu dituzte nabigatzailea eta mugikorra euskaratzera. Bakoitzak ahalegin txikia eginda, ekarpena egingo dio euskararen normalizazioari. Eta, aldaketa errazteko bi baliabide sortu dituzte: automatikoki nabigatzailea euskaratzen duen plugina eta telefono mugikorra euskaratzen duen aplikazioa, mugikorrak onartzen duen kasuetan.

Horrez gain, haur, nerabe eta gazteei horren garrantzia azaltzeaz gainera, horiek ezagutaraztea eta erabiltzen irakastea da helburua. Horretarako, Interneten ere, lehen hitza euskaraz unitate didaktikoa prestatu da. Unitate didaktiko hori Ikastolen Elkarteko ikastoletan landu dezaten bultzatuko da, eta, era berean, beste ikastetxe guztien esku jarri eta erabiltzera animatu dituzte antolatzaileek.

Bestetik, webguneen arduradunei ere euskara lehenesteko deia egin diete sustatzaileek. Hau da, haien webguneek defektuz lehen orria euskaraz erakutsi dezaten, hautua cookien esku utzi beharrean. Izan ere, sarri erabiltzaileek ez dute erabaki kontzienterik hartzen, ez dituzte gailuen hizkuntzak konfiguratzen. Eta, erakunde eta enpresen ardura ere bada haien webguneek ematen duten lehen hizkuntza definitzea.

 

II. Euskarazko Interneten Egunean aurkeztuko da egitasmoa

Interneten ere, lehen hitza euskaraz egitasmoa maiatzaren 17an, Euskarazko Interneten Egunean aurkeztuko zaio gizarteari. Izan ere, maiatzaren 17 honetan, Nazioarteko Interneten Egunean, ospatuko du komunitateak Euskarazko Interneten Eguna, bigarren urtez jarraian. Aurten, Azpeitian ospatukoa da PuntuEUS Fundazioak eta Kulturaz Kultur Kooperatibak antolatuta.

Internet egunaren helburua eguna ospatzea eta euskarazko Interneten sustapenean eragitea izango da. Beti ere, festa giroan. Festa girotzen izango dira Miren Gaztañaga aktorea eta Xabi Solano eta DZ musikariak. Beste sorpresa asko ere izango dira. Azpeitiko San Agustin Kulturgunean, arratsaldeko 19.00etatik aurrera.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa