Orain dela bi urtetik, Leizarra Musika eskolak du herriko dantza taldearen ardura eta hari dagokio, aurten, biharko egitaraua antolatzea. "Ohituta gaude haur dantzariak kalean ikustera, baina ez horrenbeste adin batetik gorako dantzariak elkarrekin ikustera; eta, hain justu, hori da biharko topaketaren helburua, bailaran dauden helduen taldeen lana herritarrekin partekatzea", azaldu du Mariatxen Urkiak, Leizarra musika eskolako zuzendariak.
Talde bakoitzak bere izaera eta ezaugarriak dituen arren, bailarako taldeen arteko harremana gertukoa eta elkarlanean oinarritutakoa dela dio Urkiak: "Hiru hilean behin biltzen gara elkarrekin egiten ditugun topaketak prestatzeko. Horrez gainera, elkarrekin ikastaroak ere egiten ditugu. Esaterako, dantza talde batek dantza zehatz bat ikasi gura badu eta beste talderen batek baldin badaki, bata bestearen irakasle izaten gara askotan; eta kanpotik irakasleren bat ekarri behar badugu, guztion artean adosten dugu".
Kalejira, alardea eta bazkaria
120 dantzari inguru batuko dira; erdiguneko kaleetan zehar kalejira egingo dute, 11:30ean, eta alardea gero, 12:00etan, Herriko Plazan. "Dantza batzuk elkarrekin dantzatuko ditugu: mutilek, esaterako, Gipuzkoako Paloteatua eta Oiongo Patroia eskainiko dituzte; neskek, besteak beste, Gorulariak eta Cuatro calles. Horrez gainera, dantza mistoak ere izango dira: arin-arina eta fandangoa, Arabako poutporria eta Domingiloa. Ondoren, talde bakoitzak dantza bana eskainiko du. Durana kalean bazkalduko dugu gero, eta arratsaldean, dantza poteoa egingo dugu erdiguneko tabernetan", azaldu du Mikel Arcek, Leizarra DantzaTaldeko irakasleak.
Datorren urtean, 25 urte
Herriak txandakatuta antolatzen dituzte, eta hurrengoa Arrasaten egitea aurreikusten dute.
