goiena.eus

Futbol jardunaldi erakargarriaren aurrean

  Kirola  Antzuola  Aretxabaleta  Arrasate  Bergara  Oñati

Futbolean jardunaldi interesgarria izango da asteburukoa, bai Ohorezko erregionalean eta baita beheragoko kategorian ere. Aloña Mendik finala izango du jokoan, Mondrak eta UDAk aurrealdeko taldeen bisita izango dute; Bergarak eta Antzuolak mailaz igotzeko borrokan beste partidu garrantzitsu bat izango dute, eta emakumezkoetan, Bergara-Mondra derbia izango da, kopan.

Futbol jardunaldi erakargarriaren aurrean
Aloña Mendik etxean jokatuko du bigarren astez jarraian. | Ikusi handiago | Argazki originala

Aurrealdeko postuak gehiago estutzeko aukera aparta dute ibarreko ordezkariek asteburuan. Zapatuan, laugarren dagoen Mondrak (46) lider dagoen Anaitasuna (54) hartuko du Mojategin (16:30), eta domekan hirugarren dagoen Aretxabaletak (51) bosgarren dagoen Real Unionen (45) bisita izango du. Aretxabaletak lehenengo itzulian falta izan zitzaion erregulartasuna lortu du, eta Mondrak atzerapausoa egin du aurrekoen borroka horretan, etxetik kanpora galdutako azken bi partiduen ondorioz. Zubiaren mutilek, baina, azarotik ez dute etxean partidurik galdu.  

Aloña Mendik beste final bat 

Joan den asteko garaipen garrantzitsuaren ostean (2-1), Oñatiko taldeak hil ala biziko beste partidu bat izango du, ostera ere Azkoagainen (Domeka, 16:30). Izan ere, Urzelairen mutilek (25) postu bat gorago dagoen Hondarribia (29) izango dute aurrean. Ezinbestekoa da garaipena Hondarribia ere atzealdekoen saltsan sartu arazteko  

Bergarak ere etxean 

Beheragoko kategorietan ere partidu garrantzitsuak egongo dira jokoan. Lider jarraitzen duen Bergarak Lagun Onak hartuko du bihar Agorrosinen (17:00), eta Antzuolak ere lehenengo postua defendatzeko partidua jokatuko du Donostian bihar (19:30, Vasconiaren kontra). 

Emakumezkoetan, derbia

Igoera fasean dabilen Arizmendik Mutriku hartuko du bihar (11:00), eta Bergarak eta Mondrak derbia jokatuko dute kopa barruan (Domekan, 17:00, Ipintzan).

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa