goiena.eus

Laburbira bi aldiz pasako da Debagoienetik

  Kultura  Debagoiena

Badator Laburbira, Euskaltzaleen Topagunearen euskarazko film laburren zirkuitua. Martxoan zehar egingo da euskarazko film laburren zirkuituaren hamalaugarren edizioa. Arrasate eta Bergaratik pasatuko da aurten.

Martxoaren 3an hasi eta apirilaren 7an bukatuko da aurtengo Laburbira, Euskaltzaleen Topaguneak antolatzen duen euskarazko film laburren zirkuitua. Laburbiraren helburu nagusiak euskarazko film laburrak eta haien egileak ezagutaraztea da, ikusleek hauek ezagutu eta beraiekin gozatzeko aukera emanez.

Denbora tarte horretan, Euskal Herriko eta atzerriko 32 herri eta hiri zeharkatuko ditu. Hamalaugarren edizio honetan Debagoienean ere geldituko da Laburbira, bi aldiz gainera. Martxoaren 22an Arrasaten egingo du lehen geldialdia, Kulturaten, arratsaldeko 19:00tan, AED elkartearen eskutik. Bigarrena aldiz, Bergaran izango da, Jardun Euskara Elkartearen eskutik Kartzela Zaharrean ikusteko aukera izango da martxoaren 26an, arratsaldeko 19:00tan.

Aurtengo ediziora aurkeztutako hogeita bi lanetatik elkarren artean oso desberdinak diren zazpi film labur aukeratu dituzte antolatzaileek: Oier Fuentesen Azken Saskia, Ageda kopla taldearen Beti bezperako koplak, Alejandro Diaz Castañoren Ihesa, Ibon Izaren Elemakarrak, Eki Pagoagaren Jalgi, UDA Filmsen 280º eta Kepa Sojoren Hileta. Gainera, EUSPOT lehiaketako spot onenak ikusteko aukera ere izango da film laburrekin batera.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa