"Gure hizkuntza gutxitua da, baina eutsi egiten dio eta bizitzea behar du". Hala adierazi du maya yukateko hizkuntzari buruz Mexikotik Debagoienera etorri den ordezkarietako batek.
Horren adierazle, maya yukateko hizkuntzan irakurritako poema bat oparitu digu Goienakooi, bere arbasoek transmititutakoa, euren herriko sustraietatik eratorritakoa, "naturak ematen dituen seinaleen irakurketari buruzkoa" (…) "zuendako oparitxo txiki bat, berbaz, ahotsez eta izpirituz", azpimarratu duen moduan.
Hemen ikasitakoa, han aplikatzeko
Hego Amerikako zortzi komunitateko ordezkariak eta Afrikako bat izan dira, hain zuzen ere, Goiena Komunikazio Taldearen esperientzia bertatik bertara ezagutzen, ondoren, gurean ikasitakotik ahalik eta gehien nork bere herrialdera eramateko asmoarekin, bertako hizkuntza gutxitua biziberritzen edo bizirauten laguntzeko bide horretan baliatzeko.
Goiena bisitatu duten moduan, Debagoieneko beste hainbat enpresa, ekimen, esperientzia ere ezagutzen dabiltza eta ezagutuko dituzte datozen hiru hilabeteotan. Gaur, besteak beste, Arantzazun ere izango dira.
