goiena.eus

LOMCEren eta Heziberriren aurkako mobilizazioak deitu dituzte eguaztenerako

  Hezkuntza  Debagoiena

ELA eta Stee-Eilas sindikatuek ordu beteko lanuzteak eta elkarretaratzeak deitu dituzte Hego Euskal Herriko ikastetxe guztietan, Lomce legearen eta Eusko Jaurlaritzaren Heziberri proiektuaren aurka agertzeko. Arratsaldean, kale-agerraldiak izango dira lau hiriburuetan. Gurasoen elkarte Ehigek bat egin du deialdiarekin.

LOMCEren eta Heziberriren aurkako mobilizazioak deitu dituzte eguaztenerako
Lomceren aurkako mobilizazio bat Aretxabaletan. | Ikusi handiago | Argazki originala

ELAko Hezkuntza saileko ordezkariek azaltzen dutenez, deialdia egin da "aurten Lomce legea bere osotasunean ezartzen" delako; progresiboki joan da ezartzen, eta aurten, DBHko 4. mailako eta Batxilergoko 2. mailako errebalidekin, neurri guztiak ezarriko dira. Errebalidek titulua lortzea baldintzatuko dute, hau da, errebalidak gainditu ezean, ikasleak ezingo du DBHko edo Batxilergoko titulua eskuratu; aurten, proba gisa, baldintza hori gabe aplikatuko da.

Heziberri, "Lomceren euskal mozorroa"

Deitzaileek, era berean, aurkakotasuna agertuko dute Eusko Jaurlaritzak egin duen Heziberri proiektuarekiko: "Lomceren euskal mozorroa besterik ez da, eta Lomce osotasunean aplikatzea ahalbidetzen du", esan dute ELAko ordezkariek.

Hirugarren arrazoia da "azken urteotan ezartzen ari diren murrizketak".

Ikastetxe bakoitzean lehen orduan egiteko ordu beteko lanuztea eta elkarretaratzea deitu dute. 18:00etan, lau hiriburuetan kale-agerraldiak egingo dituzte.

Gainera, dei egiten diete gurasoei ordu horietan seme-alabak eskolara ez eroateko.

Erantzunak

Erantzuna | #1

Kristau Eskolak eta Ikastolen Elkarteak ez dute deialdiarekin bat egingo. Ikastolen Elkarteak zehaztu du, bere iritziz, lanuzteak "ez diola ezer ekartzen gure hezkuntza sistema eraikitzeari" eta "estatuaren hezkuntza logikari erantzuten" diola.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa