goiena.eus

"Segurtasuna lehenetsiko" dute Antzuola-Bergara zatia egiterakoan

 Antzuola  Bergara

"Azterketa geotekniko sakona egin da" proiektua idazterakoan eta "arazo handiak azaleratu" dira. Horrek, aurreikusita zegoen kostua baino handiagoa izango dela suposatuko du.

"Segurtasuna lehenetsiko" dute Antzuola-Bergara zatia egiterakoan
Aintzane Oiarbidek Bide Azpiegiturako diputatuak gaur eman ditu azalpenak Batzar Nagusietan. | Ikusi handiago | Argazki originala

Aintzane Oiarbide Bide Azpiegituretako diputatuak, GI-632 errepideko Antzuola-Bergara zatiaren proiektuaren nondik norakoak azaldu ditu gaur Batzar Nagusien aurrean. Proiektua idazketa fasean dago oraindik, eta maiatzaren amaieran bukatuta egongo dela aurreikusten da.

Aurkezpenean, Diputatuak adierazi du “hasieratik esan genuen, Deskargako obren aurrekariak ikusita, arduraz jokatuko genuela eta idazketan bertan, ohikoa baino azterketa geologiko sakonago bat egingo genuela. Eta hori da, hain zuzen ere, egin duguna. Eta azterketa geologiko horiek detektatu dute arazo handiak daudela Antzuola eta Bergara arteko tramu horretan eta aurrekontu gehiago beharko dugula errepidea egin eta mendi magal eta ezpondak egonkortzeko”. Oiarbide diputatuak gehitu duenez “horrek ez du esan nahi obran zehar ez dela inolako inzidentziarik gertatuko. Ehuneko ehun ezin da ziurtatu ez dugula arazo gehiago edukiko; baina sortu daitezkeen arazo gehienei, ahal den neurrian, aurrea hartzea da azterketa sakonaren helburua”.

Agerraldian zehar, Obra eraikuntzako zerbitzu buru Jose Mari Sarasolak azaldu ditu proiektuaren nondik norakoak eta garestitzearen arrazoiak “geotekniak azaleratu dituen arazo guztiei aurre egiteaz gain, oinarrirako obraren materiala erabiltzea aurreikusten genuen, baina orain ez daukagu material nahiko horretarako, Prestamo izeneko ezponda egiteko erabili delako. Orain, harrobian erositakoa erabili beharko da”.

Sarasolak esan duenez, ezponda erori zenean, gune horretan trazatua aldatu beharra zegoen eta hirugarren adarrari kokapen berri bat bilatu. “Proiektua idazten hasi arte ez genekien zein izango zen soluzioa” adierazi du Foru Aldundiko teknikariak. Aurkitutako soluzio berriarekin, soluzio geotekniko sendoagoak aurreikusteaz gain, onura nabarmenak izango ditu GI-632 errepidearen tramu berri horrek:

- Oraingo trazatuarekin, etorkizunean, AP-1arekin lotura zuzena egiteko aukera zabalik geratzen da.

- Loturak ezaugarri hobeak izango ditu malda eta inkorporazioei dagokionez. Aurreko proiektuan ezkerretik baziren ere, berrian eskumatik egingo dira, gidarien segurtasuna gehituz.

- Gaur egungo errepide zatia (eraikiko diren bi glorieten artekoa) hobetu egingo da kurbak txikiagotuz.

 

Erantzunak

Erantzuna | #1

Ondo badago ere Bide Azpiegiturako diputatuak emandako azalpena, badugu antzuolarrrok, baina aldi berean baita gure errepidetik egunero pasatzen diren beste milaka autogidariok (eta txirrindulariok¡), epe motzeko beste kezka bat, eta da Bergarara nahiz Deskargara doan bidea zuloz beteta dagoela. Hainbat gunetan gainera egoera are tamalgarriagoa da, batez ere Deskarga aldekoa. Eta uste dut egoera ez dela konpontzen zuloak betetzen, baizik eta konponketa sakonagoa eginez... kontuan izanda gainera egin beharreko errepide berriak bizpahiru urte iraungo duela.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa