Bilbon eta Donostian ekintzak egingo dituzte gobernuz kanpoko hainbat erakundek. Horrez gain, Euskal Herrian dauden bidezko merkataritzako dendak bisitatzera bereziki gonbidatzen dute; tartean, Arrasateko Eroskin dagoen Harreman denda.
Bilboko Areatzan karpa ipiniko dute (11:00-20:00) "jakingura duten pertsona guztientzat, bidezko kafetxo bat hartu nahi dutenentzat" eta "jaia ondo hasteko bidezko mojitoak dastatu nahi dituztenentzat ere".
Bidezko merkataritzako produktuak salduko dituzte, haren printzipioak eta helburuak panelen bidez azalduko dituzte, umeendako tailerrak izango dira, iradokizun-horma, Maiatza Globala ekimenarekin batera kale-agerraldia, Maiatzak 15 mugimenduaren urtebetea ospatzeko, eta txosna.
Donostiako Boulevardean, ekintza hauek egingo dituzte: trikiti emanaldiak (11:00), Kontukantoirekin ipuin-kontaketak (12:00), txapa tailerra (13:00), Kometarekin joko kooperatiboen tailerra (17:00), NjC-rekin musika eta dantza emanaldia (19:00), bidezko merkataritzako otzara zozketatzea (19:30) eta manifestua irakurtzea (20:00).