Horretaz gain, Foru aurrekontuak onartzeko, EAJk Bilduri eman zion "oxigenoa" kentzea eskatu diote sozialistek jeltzaleei. Izan ere, EAJk Bilduren Foru aurrekontuak babestearekin, hiri hondakinen kudeaketaren gaineko azken erabakia hartzeko sei hilabeteko epea eman die-eta EAJkoek Bildukoei. "EAJk Bilduri babesa eman izan ez balio, gaur egun Bilduko alkateak ez lirateke ausartu ere egingo atez atekoa ezartzeko urratsak ematen" diote PSE-EEkoek.
Horregatik eskatu diote EAJri, "oposizio guztia eskutik" joan dadila. Baina, era berean, ohartarazi nahi izan dute sozialistak ez direla "abenturatan sartuko" herri galdeketak eskatuz, "EAJk egin duen moduan".
EAJren erantzukizuna
"EAJk badu erantzukizunik, ardurarik, Bilduri babesa eman izanagatik eta, orain, herritarren arreta berenganatu nahian dabil, herri galdeketak proposatuz" diote.
"Hiritarrek esan digute ez dutela nahi atez atekorik", diote, sistema "garestia, zikina eta deserosoa" delako; gainera, hiri hondakinak batzeko sistema honek, hiritarren "kontrol sozial tolera ezinezkoa" dakarrela diote.
Ahal duten udal guztietan atez atekoaren aurka eta bosgarren edukiontzi marroiaren alde egingo dutela diote Debagoieneko sozialistek.