Hala, mahoneroek, porrotei dagokionez kartutxo guztiak erre dituzte: "Gure asmoa zen kartutxo hori aurrerago erretzea, baina orain badakigu zer daukagun, irabazi ala irabazi", adierazi digu aste barruan Josetxo Muniategik.
Azkena, Labegaraietan
Zapatuko kontrario Urolaren kontra (18_15, Labegaraieta) partidu ona egin beharko dute Bergarakoek: "Gure jokora itzultzearekin nahikoa izango da, eurak baino hobeak garelako. Kontua da, baina, goian dabiltzan taldeen kontra hazi egiten garela, baina atzeko postuetan daudenak etortzen direnean ito egiten garela". Hori da, hain zuzen, joan den astean gertatu zitzaiena: "Urduri, antsietate handiaz ibili ginen jokatzen, infantil mailakoek egiten dituzten hutsak eginaz. Pentsa, azken minutuetan partidua berdintzeko bi eraso jokaldi izan genituen, eta bietako batean ere ez ginen Basaurikoen areara iritsi, bidean galdu genuen baloia".
Ford Mugarrik Portugaleten
Suabe esatearren, kategoriako talde gogorrenaren kantxan jokatuko du Ford Mugarri Arrasatek zapatuan (19:00). Eta suabe diogu, makarra berba ere erabil daitekeelako Portugaleteren gainean berba egiterako orduan: "Epaile bati baino gehiagori entzun diot esaten ez dutela ulertzen talde hori zela dagoen kategoria honetan", adierazi digu Edu Orgaz entrenatzaileak. "Iturripen jokatu zutenean, bosgarren minuturako hegaleko jokalaria gure atezainari mehatxuka zebilen".
Hori horrela, biharko partiduan epailearen jarrerak dezente baldintza dezake norgehiagoka: "Kanpoan jokatzen dutenean seguru ez dutela horrenbeste puntu batuko, baina etxean jokatzen badute, eta epailea erraz kikiltzen den horietakoa bada, norgehiagoka zaila izango da. Hala ere, gu gurera, euren jokoan erori gabe".