goiena.eus

Omenaldia bizirik dauden Loiola Batailoiko bi gudari bergararrei

  Gizartea  Bergara GAURKOAK

36ko Gerran tropa frankisten aurka borrokatu zuten 18. Loiola Bataloiko gudari Andres Egaña eta Inazio Ernabide omenduko dituzte zapatuan (13:00) udaletxeko osoko bilkuren aretoan; bizirik geratzen diren bi bergarar bakarrak dira. Bergarako Udalak eta Intxorta 1937 Kultur Elkarteak antolatu dute ekitaldia.

Omenaldia hasiko da Loiola Batailoiak gerrako frontean pasatutakoak erakusten dituen 13 minutuko bideo-laburpen batekin. Dantzaririk eta kanturik ez da faltako; antolatzaileek aurreratu dute ekitaldi "hunkigarria" izango dela.

"Merezitako aitortza"

"1936ko kolpe militarraren aurkako erresistentzian demokrazia eta askatasuna defendatu zuten 200 gudari eta miliziano bergararrei merezitako aitortza egin nahi diegu", adierazi du, besteak beste, Elena Lete alkateak. Boluntario haien artetik, gehienak Loiola eta UHP batailoietan aritu ziren, baina baita Kirikiño, Dragones, San Andres, Amaiur, Saseta, Itxarkundia, Amuategi eta Ertzainetan ere.

Faxismoaren gerizpe "luzea"

Intxorta 1937 Kultur Elkarteko Julia Mongek, aldi berean, gerraosteak utzi zituen "ondorio latzak" ere gogoratu ditu: "Ia 300 pertsona atxilotuak, heriotza edo 30 urteko espetxe zigorra ezarri zieten 24 pertsonei, hainbat emakume alargun geratu ziren, erbesteratuak...".

Eta gaineratu du, 81 urte pasatu direnean, faxismoaren gerizpeak "oso luzea" izaten jarraitzen duela: "Orduko zauriak osatzeko lehenengo pausoa egia jakitea da, eta horrekin batera justizia egiten hastea, erreparazioa eta errepikatu ez dela bermatzeko. Frankismoaren inpunitatearekin bukatu egin behar dugu, denon artean lortuko dugu".

Bergarar kapitaina

Loiola Batailoia Euzko Gudarosteko lehen batailoia izan zen. Gernikan osatu zuten gerrak eztanda egin ostean borrokara joandako EAJko gazte gipuzkoarrek. Bilbo erori zenean Eusko Jaurlaritzari leial jarraitu zion gudarosteetako bat izan zen, gerora, Santoñako errendizioan parte hartu zuena. Lino Lazkano bergararra zen Loiola Batailoiko kapitaina.

2017/07/15 13:00

Bergarako udaletxeko osoko bilkuren aretoan. Bergara

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa