Azken orduko zorigaitza alde batera utzita, txondorraren esperientzia "oso aberasgarria" izan dela dio Zubeldiak: "Kalitate oso altuko ikatza atera dugu baina ederrena izan da jende asko eta asko pasatu dela Elosutik. Ikaragarria izan da azken egunotan gerturatu den jendetza; txondorra ikustera, argazkiak ateratzera... Txondorgintzan aritu izan den jendea ere hurbildu da eta euren bizipenak kontatu dizkigute. Ederra izan da". Eguaztenean hasi ziren hogei bat egunez pixkanaka sortzen joan den ikatza ateratzen; 1.600 kilotik gora aterako dute. "Hasierako helburuak erabat bete ditugu. Auzo guztiaren inplikazioarekin, gainera. Bihar [gaur] afari bat egingo dugu txondorraren bueltan bizitakoa ospatzeko", gaineratu du auzo alkateak.
Bertso afarirako izen-ematea, gaur arte
Jaietako egitarauari erreparatuz, biharko bertso-afaria –izena emateko azken eguna da gaur, 688 920 086 telefono zenbakira deituta–, Donato Larretxeak txondorrerako egurra eman duen "pagotzarra" moztuko duela, erretiratuen artean arrakasta handia izan ohi duen idi-dema eta asteleheneko bazkaria nabarmendu ditu Zubeldiak.
Udalaren diru laguntzaz kexu
Hori bai, auzo alkatea kexu agertu da Udalak jaietarako eman dien diru-laguntzaren inguruan: "900 euroko laguntza jaso dugu eta auzoetako jaietako diru laguntzen irizpideetan agertzen da landa eremuko auzoa bada eta bi eguneko festak badira, jaso beharreko diru laguntza 1.545 eurokoa izan behar dela. Hala ere, saiatuko gara jaiak behar den moduan ospatzen".
Jaietako ekintza nagusiak:
Ekainak 17, zapatua
• 16:30 Mus txapelketa.
• 20:30 Bertso afaria Julio Sotorekin eta Iban Urdangarinekin.
Ekainak 18, domeka
• 12:00 Meza nagusia.
• 13:00 Pilota partiduak.
• 14:30 Erretiratuen bazkaria Elurmendin.
• 18:00 Idi dema. Bitartean, Donato Larretxeak txondorrerako egurra eman duen pagoa moztuko du.
Ekainak 19, astelehena
• 12:00 Auzoko hildakoen omenezko meza.
• 15:00 Auzo bazkaria.
• 17:30 Ume zahar eta gazteendako jolasak.
• 19:00 Triki poteoa.
• 21:00 Auzo afaria eta erromeria.
• 00:00 Jaien amaiera.
