Osintxuko jaietako kontzertu eremuari beste zentzu bat eta eskaintza ezberdina eman guran sortu zen musika lehiaketa hau. Aurtengo edizioaren izen emate-epea maiatza hasieran zabaldu zen eta poliki poliki hainbat taldek lehiaketan parte hartzea erabaki dute. Joan den urtean 25 taldek eman zuten izena baina, zifra horrekin apurtzeko esperantza dute lehiaketaren antolatzaileek. Euren nahia, aurten debagoiendar gehiagok parte hartzea da.
Berrikuntzak
Bigarren edizio honetan, hiru berrikuntza izango dira. Batetik, aurreko urtean ez bezala, aurten hiru finalista aukeratuko dira. Bestetik, publikoaren saria gehitu dute eta, azkenik, gonbidatu berezi bat ekarriko dute oholtzara, Eskean Kristo, hain zuzen ere.
Lehiaketak bi fase izango ditu. Lehenengoan, izena eman duten talde zein bakarlari guztien artean, hiru finalista aukeratuko dira. Finalistak ekaina amaierarako aukeratuko dituztela aurreikusi dute antolatzaileek. Bigarren fasea, Osintxuko jaietan finalistek eskainiko duten kontzertua da.
Bete beharrekoak
Izen ematea, ekainaren 9ra arte egongo da zabalik eta mezu bat bidali beharko da osintxunmusikara@gmail.com helbidera. Honetan, azaldu beharrekoak hauek dira: taldearen izena, herria, taldekide bakoitzaren izen-abizenak zein adina, biografia, abestiak MP3 formatuan eta harremanetan jartzeko telefono zenbakia. Lege oinarri denak Facebookeko Osintxun Musikara! kontuan aurki daitezke.
