Bergarako gaztetxea bete-bete egin zen esperientzia handiko lau bertsolarien saioa gertutik jarraitzeko. Bertso saio luzea eta umorez betea eskaini zuten Lujanbiok, Iturriagak, Maiak eta Elortzak, eta entzuleek eskertu egin zituzten euren arteko txantxak eta ziriak.
"Oso oso ondo joan zen saioa, eta bertsolariak ere oso gustura gelditu ziren. Agian, gaztetxean izanik lizentzia gehiago hartu zuten euren artean txantxak egiteko, eta barre asko egin zuten entzuleek. Barrerako eta bromarako tarte polita egon zen, eta denok datorren urtean errepikatzeko gogoarekin gelditu garela uste dut", azaldu du gai jartzaile lanetan aritu zen Ibon Leibar bergararrak.