Pasa den abenduan arduradun gabe gelditu zen Gorlako kantina eta orain, hilabete batzuk pasatu ostean, Itziar Casanellas gazte bergararrak hartu du kantinaren ardura.
Eguaztenean izan zen inaugurazioa eta atzo, eguena, ireki zuten ofizialki kantina. Aurrerantzean, astelehenetan itxita egongo da eta martitzenetik domekara bitartean egongo da zabalik, 9:00etatik aurrera. "Afariak egon ezkero, hauek bukatzean itxiko dugu. Aste barruan askotariko platereko menu bat eskainiko dugu, postrearekin eta kafearekin, 11 eurotan. Asteburuetan, berriz, menu berezia", dio Casanellasek. Horrez gain, astean zehar, karta bat edukiko dute, errazioekin, ogitartekoekin eta plater konbinatuekin, eta pintxoak eta salda ere egongo dira, "edozein momentutan".