Disziplina ugari jorratu ditu Daniel Laskurainek bere artista ibilbidean. Izan ere, pintura, lan grafikoak edota marrazketa egin ditu, eta iaz Simon, dibujante callejero izeneko nobela grafikoa argitaratu zuen.
Egun Iruñean bizi den arren, bergararra da bera, eta orain bere artelanak jaioterrian ipini ditu ikusgai. 2012tik dihardu Habiak proiektuan murgilduta.
Honela aurkezten du Laskurainek bere erakusketa:
"Egun batean bizitza hartu zuten habiek.
Orain hutsik, abandonaturik, zapuztuak, eguzkiak eta suak erreta, babesgabetasunak ematen duen patinarekin, haize zabalak eta ahanzturak garaituak.
Gure begi itxi aurrean desagertzen den bizitza naturalaren metaforak.
Baina itxaropeneko lekukoak ere; norbaitek eraiki zituen eta norbaitek hor jarri zituen".
