Beste urte batez, lankidetzan aritzeko hitzarmena sinatu dute Udalak eta Bedelkar Merkatarien Elkarteak.
Bedelkarreko presidente Ana Revueltak adierazi du orain arte "oso baliagarria" izan zaiela Udalarekin daukaten lankidetza, eta pozik azaldu da elkarlanerako konpromiso hori berretsi dutelako: "guretako oso garrantzitsua da herriko komertzioak batuta egotea, eta horretarako oso ondo datorkigu Udalaren laguntza".
Bere aldetik, Elena Lete alkateak nabarmendu du gaur egun komertzio txikiek hainbat erronkari egin behar dietela aurre: "Lehenago lehiakiderik gogorrenak hiriburuak ziren, eta horri orain internet bidezko salmenta gehitu zaio". Hori dela eta, adierazi du Udalak lankidetzarako prest jarraituko duela: "Udala hor egongo da lankidetza honen baitan arlo desberdinetako hainbat ekintza aurrera ateratzeko".
Elkartearen eta Udalaren arteko harremana "sendotzen" ari dela dio alkateak. Era berean, Bedelkarren iniziatiba nabarmendu du, eta esan du elkartea "eredu" dela, komertzioa sustatzeko "bide berriak" lantzeagatik. Gaur egun Bergarako 81 komertzio daude elkarte honetan sartuta.
