Zapatuan, urriak 8, Bergara Kirol Elkarteko futbol sailak dagoeneko hasi den 2016-2017 denboraldi berrirako dituen talde guztien aurkezpena egingo du Agorrosingo zelaian.
Hain zuzen, 14 talde izango dituzte aurtengoan mahoneroek. Horietatik 10 mutilenak izango dira eta gainontzeko laurak, berriz, neskenak.
Aurkezpena
Aurkezpenaren aurretik, gizonezkoen talde nagusiko partidua jokatuko dute 16:00etan Agorrosinen. Bergararrek Ikasberri taldea hartuko dute etxean.
Ekitaldi berezia izango denez, oraingoan sarrera doan izango dute ikusle guztiek, klubeko bazkide izan zein ez.
Partidua bukatzean, banan-banan aterako dira taldeak zelaira, eta argazkiak aterako dituzte. Aurkezpenean zehar, gainera, zozketak egingo dituzte, eta musika ere izango da ekitaldia girotzeko.
Kromo bilduma
Bestalde, ekimen berezia egingo du aurten Bergara Kirol Elkarteak; izan ere, kluba osatzen duten talde desberdinetako futbol jokalarien kromoak kaleratuko dituzte, bilduma egiteko.
Kromo horiek oraindik ez daude eskuragarri, baina aurki aurkeztuko dituzte.
