Guztira hiru edukiontzi erre dira, eta alboan zeuden 8 auto kaltetuta suertatu dira, suhiltzaileak sua zegoen tokira heldu direnerako. 8 ibilgailu horietatik 3 guztiz kiskalita daude eta beste bostak kalteak dituzte, Ertzaintzak azaldu duenez. Goizean, udaltzaingoa eta udaleko langileak lanean ibili dira autoak Irala kaleko errepidetik ateratzen, eta euren jabeei abisua ematen. Dagoeneko autoen jabea guztiekin harremanetan jarri dira, eta zortzi ibilgailuak atera dituzte Irala kaletik.
Gainera, edukiontzien inguruan zeuden hiru zuhaitz enborretik moztu behar izan dituzte goizean goiz Bergarako udaleko langileek, egurra erre ondoren oinezkoendako arriskutsuak bilakatu litezkeelako. Aurrena, adarrak apurka mozten ibili dira, eta gero motozerrarekin behera bota dituzte zuhaitzak.
Errepidean ere kalte nabariak eragin ditu suteak, eta zati bat, gutxienez, berriro asfaltatu beharko dute. Kaltetutako zatiaren asfaltatzea eta kaleko konpontze lanak bihar bertan hasiko dituzte. Gainera, Irala kalean kokatuko diren hiru edukiontzi berriak, toki berean jartzeko prest daude.
