Diputazioarekin elkarlanean diseinatu du Bergarako udalak Askarruntz auzorako mugikortasun hobekuntzak; trafiko aldaketa batzuk egingo dituzte autoen abiadura moteldu eta arriskua jaisteko. Hauxe da proposamena: gaur egun bi noranzko dituen errepidea, norabide bakarreko errepide bezala jarriko da, beraz, hortik igoko lirateke autoak. Bide beltza bezala ezagutzen den errepidetik jaitsiko lirateke gero.
Trafikoa ere baretu egingo dute eta horretarako hainbat aldaketa egingo dituzte: abiadura mugak jarriko dituzte, gaur egungo bi noranzkoetako errepidea estutu egingo dute eta norabide bakarreko bezala jarriko dute eta oinezkoen babesguneak ere jarriko dituzte.
Horrekin guztiarekin, trafikoa baretuko dutela espero dute eta lanokin iraila inguruan hastea: "Diputazioak lanak esleitu behar ditu lehenengo eta lanokin laster hastea espero dugu. Gure nahia irailean egitea izango litzateke", azaldu du Jaione Isazelaia alkateak.
Auzotarrak pozik
Askarruntz auzoan egingo diren trafiko aldaketa horien berri eman zien atzo, martitzena, alkateak udaletxean eta herritarrek euren zalantzak argitzeko aukera ere izan zuten bertan.
Auzotarrak pozik zeuden horrenbeste urtean egindako eskaerari erantzuna emango zaiolako azkenean eta alkatea ere pozarren zegoen batez ere auzotarrengatik, euren nahia beteko delako.