Eta gehitzen dute, "beste udalerri batzuetan egindako esperientziek zatiki organikoaren gaikako bilketarekin lor daitezkeen emaitza bikainak ongi frogatu dituzte; arrazoi eta beharrik gabe ontzi, zutoin, langile eta kale garbiketan egindako gasturik gabe eta bizilagunei atez atekoak sortzen dizkien eragozpenik gabe, gainera".
Horri gehitzen diote, urtebeteren buruan emaitzak espero zitezkeenak ez badira, kontsulta lotesle bat egiteko, udalerrian zabor bilketarako aukerarik jasangarriena eta egokiena zein den erabakitzeko: atez atekoa edo edukiontzi marroia.
Era berean, idatzizko eskaera horretan alkateari gogora erazten diote joan den martxoaren 26an euren manifestuari 4.691 bergararrek adierazitako atxikimendua bermatzen duen sinaduren dokumentua eman ziotela 5. edukiontziaren eta kontsultaren alde, hondakinen bilketa sistema birplanteatuz, eta ez dutela erantzunik jaso: "Ez dugu erantzunik jaso eta, itxuraren arabera, atzera egin ezinezko bidetik abiatzea erabaki duzula dirudi, zure herrikideen eskaerei jaramonik egin gabe. Gogoratu nahi dizugu alkate izan zintezen botoa eman zizuten herritar kopurua baino handiagoa ordezkatzen dugula guk, arazo honetan legitimidadea gurea dela, ez zurea, nahiz eta gehiengoari bizkar emanez, zure alkatekeria ezartzeko legalidadeaz baliatu".
Bergara Garbia Plataformak uste du arazoa oraindik bideratu daitekeela "erantzukizunez eta bide demokratikoetatik", eta horregatik egiten duela proposamena.