“Urteari hasiera oso desberdina eman diogu, oso pozik gaude familian kide bat gehiagorekin. Zer gehiago eska diezaiokegu urte berriari!”, azaldu du bailarako ospitalean 2019an jaio den lehen umearen amak. Erditzerako aurreikusita zeukaten eguna baino ia astebete beranduago jaio da Gael Garcia. Hauxe adierazi du amak: “Erditzerako aurreikusita geneukan eguna abenduaren 25a zen, baina pixka bat atzeratu da eta urteko lehena izatea gura izan du”. Orain, Mari Carmen eta Mikel gurasoak etxera joateko gogoz daude: “Bost urteko Danel umea ere badaukagu eta etxera joateko gogoz gaude, guztiok batera egoteko”.
2018ko azkena
Debagoieneko ospitalean 2018an jaiotako azken umea berriz, Unax Fabian Nevado eskoriatzarra izan da. Abenduaren 31n jaio zen, arratsaldeko 19:00etan, 3,640 kilorekin.