Zahartzaro aktiboa proiektuekin hornitzen

Xabi Gorostidi 2017ko eka. 19a, 12:16

Bizipoz proiektuak bete du bere zikloa Arrasaten, eta gaur egin dute agur emanaldia. Bertan sortutako hiru taldeek euren proiektuak aurkeztu dituzte (Ibilaldi osasuntsuak, nagusien kontseilua eta Arrasateko inmigrazioari buruzko aurreiritziak) eta parte hartzaileek esperientzia aberasgarria izan dela azaldu dute.

Bizipoz-en koordinaziopean Arrasateko erretiratu talde bat giza proiektu interesgarriak garatzen aritu dira apiriletik hona. Hasieran, banan-banako elkarrizketa pertsonalak egin zizkieten partaide bakoitzaren interesak azaleratzeko, eta ondoren gustu horien araberako lan-taldeak sortu zituzten.

Hiru izan dira tarte honetan garatu dituzten proiektuak; Ibilaldi osasuntsuak, nagusien kontseilua eta Arrasateko inmigrazioari buruzko aurreiritziak. Gaur goizean aurkeztu dituzte Kulturaten egindako ekitaldian, eta bertan izan da besteak beste Amaia Aspiazu Gizarte Ongizateko zinegotzia.

 

Irudia: Amaia Aspiazu Gizarte Ongizateko zinegotziak hitza hartu du aurkezpen ekitaldiaren hasieran.

Lehen taldekoak, "kolesterolaren ruta" famatua alde batera utzi, eta bestelako ibilaldiak sustatzeko lanean aritu dira. Horretarako, Besaide Kirol Elkarteko kideen laguntza izan dute, besteak beste, eta ibilaldiei balio erantsia emateko Arrasate Zientzia Elkartekoekin batzartzeko asmoa adierazi dute, datu historikoak gehituz interesgarriagoak izan daitezen.

irudia: Lehen taldeko kideak euren proiektua azaltzen.

Bigarren taldekoen nagusien kontseilua eratzeko proposamena garatu dute. Honen helburua 60 urtetik gorako herritarren egoera aztertzea izango litzateke, eta horretarako Ordizian aurretik garatutako eredu bat izan dute aztergai.

Azken taldeak, Arrasateko inmigrazioa hartu du aztergai gisa. Herrian gaiarekin lotutako aurreiritzi asko zeudela ikusita, errealitatea datuekin hornitu dute. Hala, herriko inmigrazioa tasa Euskal Autonomi Erkidegokoa baino baxuagoa dela ikusi dute (EAE %9, Arrasate %6,5). Kanpotarrek jasotzen dituzten laguntzak ere aztertu dituzte. Diru-sarrera bermatzeko laguntzari buruz, jasotzen dutenen % 13,8a immigranteak direla azaldu dute. Arrasaten 1.414 lagunek jasotzen dute laguntza hori, eta horietatik 195 immigranteak dira. Kanpotik datozenei jarraitzen duten ongi-etorri protokoloa ere aztertu dute, eta irailetik aurrera Txatxilipurdi eta AED elkarteekin batera hura hobetzeko bileretan parte hartuko dutela ere iragarri dute.

 

 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak