Haur Kontseiluak Haurren Hiria proiektuan du jatorria. Horren xede nagusia tokiko politiketan umetasun parametroa gehitzea da eta Francesco Tonuccik sortu zuen 1991n. Konfiantza, autonomia, partaidetza eta osasunerako baldintzak berrezartzeko balio du, erlazioak, baliabideak zein espazio komunak eraldatzeko.
Proiektu hori duela 25 urte baino gehiago sortu zen arren, gure inguruan orain dela gutxi txertatu da; hain zuzen ere, 2014an. Urte hartan, Innobasquek sortu zuen hemengo Haur Hirien sarea, Tonucciren proiektuak proposatzen dituen parametroen araberako ekimenak sortu guran. Arrasate aipatutako sare horren barruan dago eta haur Kontseilua da marko horretan sortu den lehenengo ekimena.
Haurren Hiria
Haurren ikuspegia, beraz, funtsezkoa da proiektu horretan. Horrenbeste, hiriarekin eta tokiko kudeaketarekin lotura duten gaiei buruzko iritzia eskainiko diote alkatetzari. Horrez gainera, aholkuak eta proposamenak emateaz ere arduratzen da Haur Kontseilua. Proiektu horretan, Lehen Hezkuntzako bosgarren eta seigarren mailetako hamazortzi haur daude. Kontseilua hilean behin elkartzen da, udalerrientzako onuragarriak izan daitezkeen proposamenak eta proiektuak garatzeko.
Nahiko berria denez, lehenengo urte honetan, Santa Barbara parkearen erabileraren gainean aritu dira. Horren gaineko hausnarketa sakona egin dute eta bertan garatu daitezkeen hainbat ideia proposatu dituzte; besteak beste, naturaz gozatzeko aukerak, udako zinema, kirol aisialdirako gunea eta aterpea jartzea.
'Kaleak jolastu!' jaialdia
Datorren eguenean, ekainaren 15ean, ospatuko da jaialdi hori. Jaialdiaren helburua da Haur Kontseiluaren funtsa eta orain arte egin duen lana nolakoa izan den ezagutzera ematea. Horregatik antolatu dute jaialdia, haur zein helduek hirian jolasteko duten eskubidea aldarrikatzeko eta gauzatzeko.
Egun horretan 17:30ean, Haur Kontseiluaren partaideek eta udal taldeek kontseiluaren gaineko nondik norakoak azalduko dituzte. Horrez gainera, urtean zehar garatu dituzten ideia eta proiektuak aurkeztuko dituzte. Horrela emango zaio hasiera jaialdiari. Biteri plazatik hasita, Altxorraren bila jolasa izango da. Hainbat pista jarraitu beharko dira eta Santa Barbara parkean zehar arituko dira, hango txokoak ezagutu nahian. Haur txikiek ere badute lekua jaialdi horretan; hain zuzen, arratsalde osoan, horientzako musika eta jolasak eskainiko dituzte Biteri Plazan.
