EAJk eta PSE-EEk osatzen duten gobernu koalizioko kideek, agintaldiaren lehen bi urteetan egindakoak aztertzeko eta geratzen den agintaldirako erronkak iragartzeko, agerraldia egin zuten asteazkenean, Kulturaten.
Hauteskude garaiko promesak
Maria Ubarretxena alkateak hartu zuen hitza, lehenik eta behin. Udal Gobernuaren lehentasun nagusia hauteskunde aurreko garaian arrasatearrekin hartutako konpromisoak betetzea izan dela azaldu zuen.
“Intentsitate eta lan handiko bi urte izan dira, baina esfortzuz, ilusioz eta dedikazioz beteriko eguneroko lanari esker, hauteskunde programan jasoak genituen ekimen eta proiektu gehienak martxan jartzea lortu dugu”.
Hori frogatzeko, duela bi urte egindako hauteskunde programaren eskuorria jarri zuen mahai gainean, arrasatearrekin hartutako hamar puntuko programa betetzen ari direla irudikatzeko. Programa horretan, sozioekonomia sustatzea, kultura eta kultur aukera berriak bultzatzea eta "arrasatearren egungo beharrei egokitutako herri bizi, irisgarri eta atsegina eraikitzea" zirela azaldu zuen Ubarretxenak, eta adibide gisa jarri zituen, esate baterako, Kulturola egitasmoa, enplegu edota komertzio plan estrategikoak, mugikortasun plana eta Makatzenako igogailu proiektua, Zaldibarko eta Munarko parkeen berritzeak eta Uarkape pilotalekuan gimnasio berri bat egiteko ekimena ere.
Amaitzeko, etorkizunera begira, "adostasunean, gardentasunean eta elkarlanean oinarritutako lan egiteko moduari helduz", hartutako konpromisoak betetzeko "gogor" lan egiten jarraituko dutela adierazi zuen.
'Ulermenaren koalizioa'
Oscar Garciak hartu zion lekukoa ondoren alkateari. Agintaldiaren tarte honetan bi alderdiek lanerako izan duten jarrera azpimarratu zuen, ulermenean oinarritutako lan harremanean fokua jarrita: "Beste herri batzuetan, agian, ez da hala izango, baina Arrasateko EAJren eta PSE-EEren arteko koalizioa benetako lantaldea da".
Alderdi Sozialistaren hauteskunde programan hartutako konpromisoak aipatu zituen ondoren. Adibide gisa jarri zituen Makatzenan eta San Josepen egindako esku hartzeak, wifi gune publikoak eta garbiketa zerbitzuaren birmoldaketa, besteak beste. "Orain arte arrasatearrak sentitzen ez ziren auzotarrak arrasatear sentitzen hasi dira".
