Joan den astean jokatutako final-laurdenetan ezustekoak izan ziren, eta ligan orain arte lider egon diren Aldatz eta Altza Porru kanpoan geratu dira Betrayerren (2-4) eta Elorraren (5-2) kontra galdu eta gero. Urtean zehar bikain ibili eta gero, fase erabakigarrian kanpoan geratu dira. Bestalde, Legendsek eta Jibarosek ere aurrera egin dute, finalerdietan daude, bi taldeek kontrarioei –Lasagabaster eta Africa United– seina gol egin eta gero. Hala, zapatuan, 11:30ean jokatuko duten lehen finalerdian Legends eta Elorra izango dira aurrez aurre, eta 12:30ean Jibarosek eta Betrayerrek neurtuko dituzte indarrak.
Lehen faseko partidu berberak
Hain zuzen ere, bi talde horiek ligako lehen fasean neurtu zituzten indarrak, eta, orduan, Betrayerrek (7-5) eta Legendsek (3-1) irabazi zituzten partiduak. Ikusteko dago zapatuan zer gertatuko den.
