Kultura ikuspegi askotatik aztertzea du helburu eguenetan, 21:00ean Goiena Telebistan eskaintzen den EKT -Euskal Kulturgintzaren Transmisioa- izeneko saioak. MUren laguntzarekin hiru komunikabidek elkarlanean egindako elkarrizketa saioa da: Goiena, Bilbo Hiria irratia eta Euskadi irratiak. Datorren asteko saioan Ane Zabalak (Bilbo Hiria) Ibai Iztueta elkarrizketatuko du.
Saltsa askotako perrexila da Iztueta (Zegama, 1977). Biologia ikasketak egin zituen lehenengo, Irakasle-ikasketak ondoren eta Giza Zientzietan doktoregoa, geroago. Gaur egun, Lehen Hezkuntzako irakasle da Gasteizen.
'Cultura Vasca vs Euskal Kultura'
Euskal kultura eta hizkuntzak: diskurtsoak eta Hego Euskal Herriko liburu ekoizpena euskal/espainol ardatzaren argitan izeneko tesia defendatu zuen Iztuetak iazko irailean. Lan horren laburpen modura, Utriusque Vasconiae argitaletxeak Cultura vasca vs. euskal kultura izenburua duen liburu mardula eta mamitsua argitaratu zuen; eta hain justu, saiakera hori izango da Iztueta eta Zabalaren arteko solasaldiaren ardatz nagusia.
Euskal kultura euskaraz egindakoa da bakarrik ala gazteleraz edo frantsesez egindakoa ere bai? Galdera horren erantzunaren bila jardun zuen Iztuetak; eta abiapuntu moduan Txillardegik eta Ramon Zallok esandakoak aukeratu zituen. Txillardegirentzako, "euskal kultura euskaraz baino ez da posible euskara delako egiazki bereizten gaituen gauza bakarra"; eta Zallorentzako, berriz, hizkuntzak ez du horrenbeste garrantzirik, eta halaxe dio: "Euskal Herrian bizi den jendearen nortasunak askotarikoak dira, beraz, espainolez eta frantsesez egiten dena ere euskal kultura da".
Iztuetak tesia "Euskal Herria menpekotasun politikoa eta zatiketa bizi duen herria" testuinguruan kokatu duela dio; egueneko saioan azalduko dituzte atera dituen ondorio nagusiak.
