Deba-Urolako Ertzain-etxeko agenteek Arrasateko San Andres auzoan dagoen taberna batean egindako drogen aurkako operatiboan 43 urteko gizon bat atxilotu zuten ostegun arratsaldean. Gizona zerbitzari lanetan aritzen zen tabernan jabea egoten ez zen tartean.
Ertzaintzako agenteak tabako pakete bat komun baten azpian ezkutatzen ari zen gizon bat atzeman ondoren, erakutsitako jarrerak agentearengan susmoak piztu zituen eta gizona identifikatu eta miatzera ekin zuten. Eusko Jaurlaritzako Segurtasun Sailaren arabera, tabako paketean sustantzia estupefaziente baten 15 dosi aurkitu zituzten lehen miaketa batean, eta jarraian gizonaren gauzen artean beste 47 dosi gehiago, 3 tableta haxix eta 4 marihuana ezkur aurkitu zituzten. Honetaz gain, 1.392 euro ere gainean zeramatzan gizonak.
Hau ikusirik, ertzainek gizona atxilotu eta Ertzain-etxera eraman zuten ondoren epailearen aurrera eramateko egin beharreko eginbideak burutzera.