goiena.eus

Erakunde bisita egin dute Gipuzkoako Foru Aldunditik Arrasatera

  Ekonomia  Arrasate

Markel Olano diputatu nagusia goizean bere taldearekin batera, Arrasateko udaletxean izan da herriko alkate Maria Ubarretxenarekin lan-bilera egiten, eta ostean, Imanol Lasa Gobernantza eta Gizartearekiko Komunikazioko diputatuarekin batera Arrasateko hainbat enpresa bisitatu dituzte, tartean Ausolan enpresa.

Gipuzkoako diputatu nagusi Markel Olano, Arrasateko alkate Maria Ubarretxena alkatearekin batera iritsi da Ausolan kooperatibara. Bertako zuzendaritzako kideek egin diete ongietorria, eta bilera egin ostean, lantokia barrutik ezagutzeko aukera izan dute.

Aurretik baina, Arrasatek zein lehentasun nagusi dituen aztertu dituzte udaletxean izandako lan bileran, eta Ausolanera iritsi direnean Olanok azaldu du azpimarra jarri nahi izan dietela bileran, batik bat aspektu ekonomiko eta sozialei. Hauxe adierazi du: "Uste dugu gure bizi kalitatea eta baita ere elkartasuna Gipuzkoan mantentzen dugula bihotza industriala daukagulako eta enpresek sortzen dutelako aberastasuna. Eta hori nonbaiten ikusten baldin bada garbi, da Debagoieneko bailaran eta Arrasaten bertan", esan du diputatu nagusiak.

Debagoienean 3,7 milioiko inbertsioa iaz

Olanok gaineratu du, bailara honetan ikusita berrikuntzak eta arlo ekonomikoak zein garrantzia daukan, hor egin dutela apustua: "Adibidez, sustapen ekonomikoaren departamenduko datuak esanguratsuak dira oso Arrasate eta bere bailara osoan. Debagoienean berrikuntza eta sustapen ekonomiko kontzeptuetan 3,7 miloi euroko inbertsioa egin genuen iaz, 2016ko urtean, eta ikusten duzuen bezala, horiek oso zifra potoloak dira".

Lanako biribilgunea

Gogora ekarri du baita ere, Bedoñara bidean dagoen Lana lotunean biribilgunea egitea adostuta dutela. Denera 600 mila euroko aurrekontua dauka biribilgune horrek; Foru Aldundiak jarriko ditu 400 mila eta Udalak beste 200. "Horrekin egiten dugun apustua da ikuspegi ekonomikotik enpresei erraztasuna eman lehiakorrak izan daitezen etorkizunari begira, enplegua mantendu dezaten eta bistan da une honetan kooperatibek ere bailara honetan duten pisua ikusita, garbi daukagu Mondragon Taldearekin gure kolaborazioa oso estua izango dela hemendik aurrera ere", azaldu du.

Alkateak, esker hitzak

Arrasateko alkate Maria Ubarretxenak, bestetik, esker hitzak izan ditu Aldundiarendako, eta hauxe esan du: "Arrasateko udaletxetik eskertzen dugu, nola ez, Aldundiaren laguntza. Olanok azaldu duen bezala, bailara honetan inbertitu dituzten baliabideak izan direlako oso garrantzitsuak. Bide horretatik nahi genuke jarraitzea, eta gure aldetik esker ona eta honek guztiak ekar dezala aurrerakuntza, enplegua eta ekonomiaren hobekuntza bat".

Beste enpresa batzuetan ere izan dira

Ausolaneko bisitaren ostean, Ekide enpresa ezagutzera joan dira, eta arratsaldean Mondragon Goi Eskola Politeknikoa ere bisitatuko dute. Baita Aretxabaletako Otalora enpresan ere.

Erantzunak

Erabiltzailearen aurpegia Erantzuna | #1

Arrasatera egindako bisitaren bezperan, Gipuzkoako Foru Gobernuaren gardentasun eza agerian geratu zen Batzar Nagusietako Osoko Bilkuran. Izan ere, EAJk eta PSEk bere gehiengo osoa erabili zuten oposizioak jasotzen duen informazioari trabak jartzeko.

Alde batetik, aldatu egin zuten zordunei isunak barkatzeko prozedura, aurretik oposizioari informatzeko betebeharra ezabatuz. Bestetik, blokeatu egin zuten aurrekontuaren jarraipenerako kontrol batzorde bat sortzeko aukera.

EH Bilduren ustez, EAJ-PSEren gobernatzeko modu iluna kezkagarria da, etengabeko atzerabideak jartzen dituztelako.

Gipuzkoako Batzar Nagusiek aldatu egin zuten zordunei isunak barkatzeko prozedura, EAJ eta PSEren aldeko botoekin. Hainbat moldaketa teknikoen artean, 6.000 eurotik gorako zehapenak edo isunak barkatzeko araua aldatu zuten. Zehazki, Gobernuak kendu egin du barkamena onartu aurretik Batzar Nagusiei informatzeko betebeharra. Modu horretan, Diputatuen Kontseiluak barkatu ditzake isunak, grazia bidez, oposizioko alderdiek aurre jakinarazpenik izan gabe.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa