2017/03/12 20:00

Amaia antzokian Arrasate

goiena.eus

Kepa Junkera & Sorginak Amaia antzokian izango dira domekan

  Kultura  Arrasate

Maletak arbasoen tradizioetan eta munduko erritmoetan inspiratutako ikuskizuna, eskainiko dute, 20:00etan. Korrika Kulturala egitarauaren barruan izango da.

Kepa Junkera & Sorginak Amaia antzokian izango dira domekan
Kepa Junkera eta Sorginak emanaldi batetan. | Ikusi handiago | Argazki originala

Orain dela lau urte abiatu zuen Kepa Junkerak Euskal Herriko hainbat trikiti eskolako ikasleekin Sorginak egitasmoa. Debagoieneko bost lagunek hartzen dute parte: hasieratik dauden Arrasateko Amets Ormaetxea, Leire Etxezarreta eta Irati Gutierrez; eta geroago batu zaizkien Maddi eta Olatz Alberdi Bergarako ahizpak. Junkeraren trikiti doinuen gainean, askotariko panderoak eta bestelako perkusio tresnak jotzen dituzte eta dantzan egin ere bai.

Diskotik ikuskizunera

2014an kaleratu zuten Trikitixaren historia txiki bat lana, eta irailean aurkeztu zuten Getxoko Folk jaialdian bigarrena: Maletak. "Oso ezberdinak dira; aurreko lanetako kantuek euskal kopla tradizionaletik asko zuten, baina oraingoak etnikoagoak dira, Keparen marka handia dute", azaldu du Amets Ormaetxeak, Arrasateko Sorginak.

Diskoa grabatu zuten eta hilabete batzuetara sortu zuten ikuskizuna. "Penintsula osoko koplak daude gure maletan, bidean aurkitzen joan garenak. Sorginak-en ibilbidean ezagutu ditugun askotariko musikariak omendu gura ditugu eta, era berean, gure arbasoei edo kulturari ere keinua egin", dio Leire Etxezarretak eta zera gaineratu du: "Herri kirolak eta musika uztartzen ditu; izan ere, taularen gainean, musikariokin batera, Karmele Gisasola harri-jasotzailea eta Aitzol Atutxa aizkolaria ere badaude".  

Sarrerak, hamabost eurotan

Arrasate.eus eta Amaia antzokiko leihatilan eskura daitezke.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa