Hala ere, azaldu digu parte-hartzaileak 22:30ean Biteri plazan egongo direla. Han danborradako pieza guztiak joko dituzte eta ondoren herriko kaleetan murgilduko dira. 12:00etarako iritsiko dira plazara.
Iaz 50 urte egin zituen danborradak; hala, aurtengoa 51. aldia izango du. "Ea beste 50 urte egiten ditugun", dio Arkauzek.
Asmoak bertan behera
SUDC elkartearen asmoa izan da aurtengo danborradara Donostiatik konpainia berezi bat ekartzea: eskopetekin eta kanoiekin tiroak jaurtitzen dituztenak. "Euren proposamena geneukan, baina aurrekontua Udalera pasa genuen eta ezetz esan ziguten. Beste urte baterako utzi dugu proposamena", dio. "Pena hartu dut, bai, oso ikuskizun polita eskaintzen dutelako, baina ezin izan da. Ea, bada, beste urte baten ekartzen ditugun", gaineratu du.
Zazpi konpainia
Aurten iaz baino konpainia bat gutxiago irtengo da danborradan, gaztetxeko konpainiak ez irtetea erabaki du. "Zazpi konpainia irtengo gara, 200 bat lagun", dio Arkauzek.
Beste berrikuntza bat izango da danborrada irekitzen joaten diren zaldiak ez direla irtengo: "Herri barruan bakarrik izango denez, uste dugu zaldi barik hobeto izango dela". Hala, Arrasateko bandera, ikurrina eta SUDCeko bandera eramaten dituzten neskak baserritar jantzita joango dira aurten. Zuzendari lanetan, azkeneko urteetan bezala, Nestor Maidaganek jardungo du. Gainera, aurten ere Araiako musika bandak lagunduko ditu Arrasateko musikariak. Eguraldiak laguntzea bakarrik falta da!
