Lekualdaketa egin dute AED eta Ekin Emakumeak elkarteak, egokitzapen lan batzuk falta zaizkie, baina lokal berrian dihardute lanean bi elkarteek. Beraz, aurrerantzean bertara joan behar da eurekin egoteko: danborradako materiala jasotzen zen lokalera, alegia. "Bide batez, eskerrak eman gura dizkiegu udal brigadako langileei, egiten dabiltzan lanarengatik", adierazi du Itxaro Artolak, AEDko dinamizatzaileak.
Jokin Zaitegi lehiaketa
Bestalde, oso pozik daude Jokin Zaitegi literatura lehiaketan aurten jasotako emaitzarekin: 39 lan aurkeztu dituzte Mario Vargas Llosaren liburua itzultzeko lehiaketara, "inoiz baino gehiago; parte-hartze handia espero genuen jatorrizko hizkuntza gaztelera delako, baina bikoiztu eta ia hirukoiztu egin da iazko parte-hartzea", dio Itxaro Artola AEDko dinamizatzaileak.
Palindromoak
Palindromo lehiaketa ere zabalik dauka Arrasateko euskara elkarteak. "Iritsi dira batzuk, 10etik gora daude, egia esan, baina gehiago behar dira. Adibidez, Arrasatekorik ez dago, eta arrasatearren artean bidalitako palindromo onenak saria dauka, beraz, anima daitezela.
Euskararen erabilera aztergai, martitzenean
Bukatzeko, martitzenerako, hilak 25, hitzordua egin dute: Zergatik ez dugu euskaldunok euskaraz egiten? izenburuarekin, Arrasaten euskararen erabilerari buruzko ikerketa aurkeztuko dute, 19:00etan, Jokin Zaitegi aretoan.