Egubakoitzean, autorik gabeko egunean Europan, Gidatzeko era efiziente-ekonomikoa izeneko doako ikastaroa eman zuten udaletxean. Han, autoek kontsumitzen duten erregaia %20 murritz daitekeela ikasi zuten. RACeko bost irakaslek jardun zuten autoan diru gutxiago gastatzeko trukuak azaltzen, lau ordu iraun zuen ikastaroan.
Azalpenak emanda, ikasitakoa praktikan jartzeko aukera ere izan zuten ikasleek. Herrian zehar bi buelta eman zituzten autoan, eta bukaeran, emaitzak alderatu zituzten. Guztiek jaitsi zuten kontsumoa bigarren bueltan, batzuk nahiko urduri jarri baziren ere.
Birzikleta azoka
Birzikleta Azoka jarri zuten Seber Altube plazan zapatu goiz eta arratsaldean. Aurreko asteetan batu zuten bigarren eskuko materiala eta zapatuan jarri zuten salgai. Arrakasta handia izan zuen merkatuak. 80 produktu inguru jarri ziren salgai eta ia guztia saldu zen.
Jabe bakoitzak jarritako salneurrian, bizikleta, patinak, kaskoak, gurpilak, maillotak... saldu zituzten. Goizeko 11etan zabaldu zuten azoka eta jende ugari batu zen plazan. Bizikleta bera aukeratu zutenek zozketa egin behar izan zuten, esaterako.
Bizikleta martxa
Bizikleta martxa ere egin zuten domeka goizean, zikloturista elkartekoek lagunduta. 300 bat lagun animatu ziren, goizeko 11etan Seber Altube plazatik irtenda, herrian zehar egin zuten ibilaldira. Eta parte hartu zutenen artean, bizikleta bat, kaskoa... zozketatu zituzten.